CAVITE – Nagsasagawa ng masusing imbestigasyon ang Cavite Police hinggil sa natagpuang bangkay sa loob ng abandonadong taxi sa Bacoor City noong Huwebes ng gabi.

Pinaniniwalaang ilang minuto nang patay ang ‘di pa nakikilalang biktima.
Ayon sa ulat, nakatanggap ng tawag ang Bacoor Component City Police Station mula sa isang concerned citizen hinggil sa isang abandonadong taxi sa Aguinaldo Highway sakop ng Brgy. Habay 2, Bacoor City, Cavite, na namataan bandang alas-10:45 ng gabi.

Ayon pa sa saksi, ilang minuto na umanong nakatigil ang nasabing sasakyan sa nasabing lugar dahilan upang ipaalam ito sa Mobile Patrol Sector 2, Bravo 2.

Agad namang nagresponde ng mga operatiba ng Bacoor CCPS at nadiskubre ang wala nang buhay na biktima sa loob ng taxi.

Inaalam kung ang biktima rin ang driver sa nasabing taxi. (SIGFRED ADSUARA)